河南水产商机交流组

雅黍talking 老早点额米道

老人宝2021-01-11 14:57:23


年纪度了,就会常常记忆起老早点额米道。


总关觉着伊个辰光额米道是交关灵光,侠气灵光,来得额灵光。


第一趟觉着有惊艳的记忆是大学刚毕业,迭句闲话一讲,是30年前哦。跟牢同学去南通伊拉阿姐窝里,哪能去额,哪能过江额,有几个人,通通忘记忒,只记得伊拉阿姐端上来一盆小青菜炒蛤蜊肉,鲜是鲜得来,眉毛要通通落光。想想看,80年代,长江还么污染,肉比小脚趾么头还小额蛤蜊肉,绝对野生绝对环保绝对专供。伊拉阿姐还讲一句:迭个叫“过江臭”,上海人契勿到额。伊辰光么冰箱么冷藏,隔条江要过大半天,加上天气热,难怪上海人契勿到迭耙鲜货。反正一歇歇就碗底朝天了。


第二个美食勒该浏河。00年左右,一家门去额。好像为了带小人出去白相,就乘长途车去了。迭个辰光也么什么景点,就野长江边郎看看野芦苇咯撒,格么到契中饭辰光,兜到镇郎厢,看到一爿饭店,叫人民饭店,环境蛮差额,里厢水门汀也滑叽叽额,但老板讲今早有长江野鮰鱼,到厨房间一看,反正鮰鱼长得漂亮,像观赏鱼一样,加上肚皮饿勒咕咕叫,格么就契伐。鮰鱼端上来额辰光,阿拉腻子眼睛也发绿了。后赛来,再也嗯么契到过迭嫩正宗额长江野鮰鱼。


第三趟是4、5年前,开车跟二个大学同学一道去云南四川,主要香格里拉和稻城亚丁。伊拉二噶头要去80年代末贩卖羊毛衫额腾冲去看看。迭二个朋友当时就想做生意,趁着暑假就在华亭路买了2大包羊毛衫,肯兹肯兹坐了2日2夜火车再转一日一夜长途汽车到腾冲。一看人家那里是热带,根本勿穿羊毛衫额。2个月也么卖出一件,最后送给房东抵了一点房钱。我们开到腾冲,想勿到城市全面改建,原来小街道小旅店通通么了,伊拉蛮伤心。回程辰光,翻越高黎贡山,翻勒老半天,下午1、2点钟才翻好,肚皮饿撒忒,就在一条溪流旁边额小饭店落脚下来。迭是一段长下坡路,阿拉看见货色车都有最后2只轮盘小一号,平常荡勒半空中,上坡辰光派用场。阿拉一开始勿晓得,穷笑八笑勒。还有,下坡辰光要用水浇刹车额,所以,每部卡车轮胎都在冒烟。谈笑间,河里撩上来额野生鲶鱼一大锅上来了。望着刚翻过的高黎贡,漏着初夏山风的路边小饭店里,我们三人契得一天世界,锅底朝天。


迭次鲶鱼锅堪比318国道上鲁朗的石锅鸡。


总结一下,遭遇美食,一般是肚皮要饿,食材绝对新鲜,还有往往人在旅途,迭个跟感情、灵感、际遇倒才蛮像额。


撰文 | 曹秉燊

编辑 | 烟林

图片来源 | 网络

声明

本期文章为老人宝独家稿件,如需转载,请联系老人宝官方微信后台获得授权。

侵权必究。

老人宝是新闻晨报为中老年朋友打造的保健养生怡情寓乐平台。这里有丰富的退休生活,权威的养生信息;亦可以谈古论今,追忆青春;每天还会陪您嘎嘎三胡(聊聊天)。

老人宝,陪你继续精彩人生。

长按二维码点击“识别图中二维码”即可关注,更精彩的内容不容错过~